Okutandika nga January 1 2024 , Munnayuganda ayingira e Congo n’Abacongo abayingira muno, si bakusasuzibwa viza’ .
Kino kiddiridde eggwanga lya Congo okwegatta ku mukago gwa East African Community era nga kino kyasaliddwawo mu lukiiko olwatudde okuva nga October 11 okutuuka nga October 15 2023 e Kinshasha.
Omwogezi wa minisitule y’ensonga ez’omunda mu ggwanga, Simon Mundeyi, agambye nti enkola eno yaakwongera okussaawo obwasseruganda mu mawanga gombi.
Mundeyi ayongeddeko nga Bannayuganda abawerako abakomyewo muno (Abasama ) bwe bazze babbibwako ssente ennyingi , ng’abafere babalimba okubaddiza pasipoota zaabwe obuggya.
Agasseeko nti abafere batuula mu bifo omuli Lufula, okumpi n’essundiro ly’amafuta mu kifo ekyo n’abalala bayimirira kumpi ne ggeeti za minisitule.
