Omuyimbi omu South Africa Costa Titch 27, ng’amannya ge amatuufu ye Costa Tsobanoglou afudde kikutuko bw’abadde ayimba ku siteegi.
Ono afudde ekiro ekyakeesezza Ssande bwe yabadde ayimba ku kivvulu kya Ultra South Africa Festival ekyabadde mu kibuga Johannesburg ekya South Africa.
Kigambibwa nti ono yagudde emirundi ebiri kyokka ogwasoose yayimuse era n’ayongera okukuba abantu omuziki kyokka ogw’okubiri teyayimuse era n’afa.
Costa Titch abadde mukubi w’omuziki oguliko ogwa Amapiano ogunyumira ennyo Bannayuganda abamu era ng’amanyiddwa nnyo olw’eNgeri gy’azinamu ng’ali ku siteegi ecamula ennyo abadigize.
Aba South Africa babadde baakamala okuziika omuyimbi omulala AKA eyafa omwezi oguwedde nga 10 bwe yakubwa amasasi ku luguudo.
Omwaka oguwedde yajja emirundi ebbiri wano mu ggwanga nga ogwasembyeyo yabadde ku Garden City Rooftop ng’ayingiza abantu omwaka 2023.
