Omukazi agambibwa okuvumbika emikono gy’abaana be babiri abato mu ssigiri okuli omuliro n’abookya ng’abalumiriza okubba enva z’ebijanjaalo, poliisi emukutte.
Bino bibadde ku kyalo Kyabutaika e Kakooge mu disitulikiti y’e Nakasongola , Justine Namuwonge 27 y’agambibwa okwokya abaana be okuli: Fatuma Nagenda 6 ne Hajara Nassuuna 4 era nga mu kiseera kino, bali mu kufuna obujjanjabi mu Kakooge Health Centre 3.
Abookeddwa bombi bayizi ku ssomero Kamukama Nursery School Kakooge.
Kigambibwa nti bwe yamaze okubookya , emikono, n’abakuumira mu nnyumba ne bavunda kyokka omuzirakisa n’atemya ku poliisi , ne bamukwata.
Omwogezi wa poliisi mu Savana Sam Tweanamazima, agambye nti, okunoonyereza kugenda mu maaso.
