Pricilla Mbabazi 80,ow’e Naggojje e Mayangayanga, anoonya ssente za kumujjanjaba oluvanyuma lw’abakozi ba bbanka abaali babanja mutabani we okumukuba n’afuna ebisago.
Ono agamba nti abasajja basatu baagenda mu maka ge ne bamweyajulira ng’abakozi ba Finance Trust .
Agamba nti baali ku pikipiki bbiri z’ataasobola kukwata nnamba .
Abaamweyanjulira kwaliko Edward Kato, omusomesa wa bbanka nga yamusaba amubuulire mutabani we Daniel Ssengendo gyali.
Mbabazi agamba nti , bwe yabannyonnyola nga bw’atamanyi gyali , baamufulumya ennyumba nga kwe batadde n’okumukuba era ne bamutegeeza ng’ennyumba ye bwe guli omusingo mutabani we gwe yassa mu bbanka nga bamuwola ssente .
Yasalawo okugulawo omusango ku poliisi y’e Naggojje ng’ali ne muwala we Edith Namirimu oguli ku ffayiro nnamba SD 09/15/03/2023.
Ssengendo agamba nti baamuwola 4,900,000/- era azze azisasulako mpolampola era bwe yafunamu obuzibu yategeeza bbanka n’agisaba okumuwaayo akadde abasasule.
