Omutendesi Mike Hillary Mutebi amaze ebbanga lya myezi ejikunukkiriza mw’essatu nga talina mulimu bukyanga agobwa ku KCCA , wabula nga abadde afuna emikisa egy’enjawulo newankubadde nga ebiseera ebisinga abadde ajigaana. Mu bbanga lino Mike Mutebi yagaana emirimu okuli ogwa Azam eye Tanzania ne Kiyovu eye Rwanda wabula nga wiiki gyetwakakuba emabega yalangiriddwa nga Omutendesi wa Vipers nga agenda kudda mu bigere bya Fred Kajoba eyagobwa ku kiraabu eno.
Akulira ekibiina ekitwala omupiira mu ggwanga erya Uganda, Ying. Moses Magogo yavuddeyo n’akinogaanya nti yatuukirirako ku mutendesi Mike Mutebi nga ekigendererwa kyali kya kuteesa naye aweebwe endagaano era atendeke ttiimu y’e ggwanga nga wekiri ekirooto kye okufuna omutendesi we ggwanga nga munnansi, wabula Mutebi n’agaana. Mutebi yategeeza nti ye awulira tanatuuka kutendeka ttiimu ya ggwanga newankubadde nga yali ajitendese ko mu 2004.
Ono wakwegatta ku Vipers okutandika ne sizoni ejja, era nga yaweereddwa endagaano ya myaka 3 gyanaamalako nga ensonga azikwasaganyiza Kitende. Ye ssenkulu wa Vipers Dr. Lawrence Mulindwa yategeezeza nti okufuna Mutebi, bafunye omutendesi omulungi mu kuzimba abaana abato, atendeka omupiira ogunyuma era omusajja omuwanguzi nga tekyerabirwe nti ono yatutte ebikopo 10 mu myaka ettaano gyamaze ku KCCA.
Capt
Mike Mutebi
