Omulabirizi wa Central Buganda eyawumula Jackson Matovu asabye abakristaayo okuzimbira abaweereza ennyumba ku Kkanisa zaabwe kibasobozese okusinziira awo okubunyisa enjiri ya Kristo mu ngeri eweesa Katonda ekitiibwa.
Okwogera bino Kitaffe mu Katonda Bishop Emeritus Jackson Matovu abadde mukusaba kw’okwebaza Katonda olwa President w’abawule mu Bulabirizi bw’eMukono ate nga ye Musumba w’Obusumba bw’eNamakwa mu Bussaabadiikoni bw’eMpumu Rev Yosam Kintu Ssemukuye n’omukyala Ruth Ssemukuye olw’okuweza emyaka 25 mu bufumbo obutukuvu ku Kkanisa y’Omutukuvu Stephen Namakwa ku kitebe ky’Obusumba wakati munamutikwa w’enkuba eyakedde okufudemba.
Omulabirizi Matovu agamba nti kyenyamiza mu kiseera kino abaweereza mu Kkanisa ya Katonda naddala ababuulizi okubeera nga basula bubi kyoka nga bebasabira emikisa nga basula bubi kyokka bbo nebasula bulungi n’olwekyo ono akutidde abakristaayo okuzimbira Omubuulizi waabwe ennyumba mu bwangu.
Ye Omubaka Fred Kayondo nga yakikirira Mukono South mulukiiko olukulu olw’eGgwanga yasabye ababuulizi mu Kkanisa ez’enjawulo okwegatta bekolemu ekibiina basobole okufuna ensimbi ez’okwekulakulanya kubanga tewali kibagaana kufuna ku nsimbi zino nga abaweereza ba Katonda.
Mukwogerako n’abagole baatutegezeza nti kubimu ebibayambye okuwangaaza obufumbo bwabwe mulimu obugumikiriza, okusonyiwagana, okukola n’okwekwasa Katonda.
Omukolo guno gwetabiddwako Provost wa Lutiiko y’Omutukuvu Fiiripo ne Andereya eMukono The Very Rev Canon Enosi Kitto Kagodo,Ba Canon,Ssaabadiikoni Robert Kiwanuka Mulinde Ssaabadiikoni w’eMpumu,Omukubiriza w’abakristaayo mu Bulabirizi ,Herbert Batamye Kyobe,Abasumba,Abakulira ebitongole eby’enjawulo mu Bulabirizi,Naava Harriet Kato Nambaziira,Ababuulizi n’abantu ba Katonda bonna era nga bano bamusondede obukadde obusoba mu kkumi okumuyambako okutandiika okuzimba amaka.
