Pulezidenti Museveni agobye mutabani we ku kifo ky’ omudduumizi w’eggye ly’oku ttaka erya UPDF.
Okusinziira ku bubaka obwafulumiziddwa ku Lwokubiri Muhoozi agenda kusikirwa Maj Gen Kayanja Muhanga ng’ Omudduumizi wa UPDF ow’oku ttaka
Museveni wabula alinyisizza Lt Gen Muhoozi eddaala namufuula Genero omujjuvu. Ekiwandiiko kino olumaze okufulumizibwa, Muhoozi nakyuusa ekibanja kye ekya Twitter nategeeza nti kati muwabuzi wa Pulezidenti ow’enjawulo ku nsonga ez’enkizo n’ebikwekweto eby’enjawulo.
Abatunuulizi b’ensonga bagamba nti eky’okukuza Muhoozi kubadde kumukakanya kuba guno mulundi gwakubiri mu bbanga lya myaka ettaano nga amugoba.
Mu 2017, Muhoozi yagobwa ku ky’omudduumizi w’eggye erikuuma pulezidenti erya Special Forces Command (SFC).
Mu buvunaanyizibwa obuggya, Muhoozi talina kakwate kamaanyi ku magye wabula bino bigenze okubaawo nga bino Muhoozi yabikonyeeko ku mukutu gwe ogwa Twitter nga bw’aliko enkyukakyuka zakanyizaako ne kitaawe.
Bino webijidde nga Muhoozi yakamala okuteeka bannakenya ku bunkenke nga ayita ku mukutu gwe ogwa Twitter bweyategeezezza nti ye ne UPDF betaaga wiiki 2 zokka nga bamaze okuwamba ekibuga Nairobi .
Abamu ku banene mu gavumenti bavuddeyo omuli Minisita Frank Tumwebaze nebasaba abantu obubaka bwa Muhoozi obutabuwa budde kuba abadde asaagamu.
Kitegeerekese nti kino kyawaliriza Minisita wa Kenya ow’ensonga ez’ebweru, Alfred Mutua okuyita Ambasada wa Uganda e Kenya, Hassan Galiwango nebabaako ensonga zebongerako omubadde n’ obubaka Muhoozi bweyatadde ku mutimbagano.
Guno si gwe mulundi ogusoose obubaka Muhoozi bwateeka ku mutimbagano okumutabula ne kitaawe, mu July w’omwaka guno bwebaali mu maka g’Obwapulezidenti Entebbe Pulezidenti Museveni yabategeeza nga okumala gawandiika oli byayagala bwekisobola okuzaalira Uganda abalabe.
Wabula kw’ olwo Muhoozi byeyali atadde ku mutimbagano yebyegaana.
