Pulezidenti Museveni asasulidde omuyimbi Jose Chamelone ssente z’eddwaaliro mu America, abasawo gye baamulongooserezza.
Eby’okusasulira Chameleone ssente z’eddwaaliro, byakakasiddwa Katikkiro wa Uganda, Robinah Nabbanja eyagambye nti Pulezidenti yasasudde ssente zonna ezaabadde zeetaagisa.
Chameleone baamusaba doola za America 100,000 (369, 693,100/-) okumulongoosa n’okumujjanjaba mu America gy’ali kati ku kitanda.
Kigambibwa nti Chameleone amaze emyaka ebiri ng’atawaanyizibwa akalulwe akaamuviirako amazzi okuyiika mu lubuto.
Museveni okusasula ensimbi zino, kyaddiridde Chameleone okuweebwa ekitanda mu America ng’ali mu mbeera mbi era abasawo abakugu ne bamuwa amagezi alongoosebwe.
Kyokka yabadde talina ssente zeetaagisa ekyawalirizza abooluganda n’emikwano okutuukirira Nabbanja ne bamusaba abatuusize okusaba kwabwe eri Pulezidenti Museveni.
Abasawo ab’enjawulo baawa Chameleone amagezi okufuna abakugu mu America abayinza okumulongoosa, kyokka nga talina ssente zimusabibwa.
Chameleone ng’amannya ge amatuufu ye Joseph Mayanja, azze alwala emirundi egiwerako n’aweebwa n’ekitanda, nga yasemba okulwala mu August 2021.
