Kkooti ejulirwamu eggye ababaka okuli owa FDC Moses Attan owa Soroti East Division mu Soroti City n’owa NRM, Derrick Orone owa Gogonyo county mu disitulikiti y’e Pallisa mu bifo byabwe n’eragira okulonda kuddibwemu.
Abalamuzi Frederick Egonda Ntende ne Eva Luswata balagidde akakiiko k’ebyokulonda kaddemu okutegeka okulonda mu bitundu bino.
Derrick Orone yatwalibwa mu kkooti ejulirwamu Issa Taligola Bantalibu ng’amulumiriza okugulirira abalonzi, okukola kakuyege ne ku lunaku lw’okulonda ssaako okutambula n’abaserikale nga bagenda batiisatiisa abantu.
Abalamuzi balagidde Derrick Orone okuliyirira Issa Taligola ssente zonna z’asaasaanyizza mu musango guno, wabula wa ddembe okuddamu okuvuganya ku kifo kino naye ng’amaze kusasula Taligola ssente ezimulagiddwa.
Ate e Soroti East Division kkooti y’emu yalagidde okulonda kuddibwemu. Herbert Edmund yagenda mu kkooti ng’awakanya ensalosalo z’emiruka ebiri okuli Opilyai ne Aloet gy’agamba nti gyalekebwa wabbali akakiiko k’ebyokulonda.
Mu kiseera kino Pulezidenti wa FDC Patrick Oboi Amuriat amakanda agatadde Soroti, wadde kakuyege n’olunaku lw’okuddamu okulonda terunnalangirirwa.
